تاج 2

وصلني تاج أول من عزيزي أسامة أمين " شمو نشادر " ونفس التاج من أخواتي في مدونة "غادة ورفيدة"..
لكن التاج صعب ومحتاج بعض من الجرأة لأنه خاص شوية..وبيخش في الأماني والأفكار ..لذلك أعتقد إني هجاوبه إن شاء الله لما ربنا ينعم علينا بالأجازة ..
أما التاج دا جالي من HERO "أحب أشكره بالمناسبة :)" ولأنه تاج "حلويات " وسهل الإجابة فهجاوبه الأول..

لو أعطيتك ثلاث وردات من هم الثلاث الأشخاص اللى هتهديهم الورد اللى معاك ؟؟
أكيد أول وردة هتبقى لوالدتي ودا بجد مش لأني لازم أقول كدا..خاصة في الفترة الأخيرة بدأت أفكر هيا بتعمل معايا إيه..ربنا يخليها ليا ويطول عمرها في طاعته..
تاني وردة لأخويا عزيزي أدهم "أخويا بجد" لأنه أخويا طبعا ولأنه صديق عمري وعلمني حاجات كتير وفتحلي أبواب خير كتير..دا حتى هو اللي أقنعني أعمل بلوج..ربنا يجازيه عني خير..
تالت وردة أديها لصديقة "مش حبيبة"ومهياش مصرية عشان محدش يفهمني غلط..بس هيا فعلا تستاهل..

لو أعطيتك ورقة بيها 3 سطور وقلت لك أكتب فيهم اللى أنت عيزه هتكتب إيه ؟؟
هقول إن كل واحد بيختار طريقه اللي يمشي فيه ومفيش أعذار أنا اللي بصحى في يوم الصبح أقول إن الحياة أغبى من أعيشها وأنا اللي بصحى يوم تاني أقول إن الحياة فيها جمال أكتر مما يمكن أن أراه..يعني مادام أنا اللي بختار خطوتي الجاية يبقى مفيش أعذار إني أبقى مقصر..عذري الوحيد إي مقصر..
ما هو هدفك فى الحياة ؟؟
في كذا اتجاه.. دينيا واجتماعيا وعلميا العلمي إني أبقى دكتور شرعي بجد وادي محاضرات على مستوى عالي والناس تشاور وتقول دا مسلم.. اجتماعيا نفسي طبعا اكون أسرة مسلمة وأتجوز واحدة بنت حلال وزي القمر واحاول اكون زوج مثالي وأصلح العك اللي رجالة مصر بيعكوه مع مراتاتهم.. :)

إن شاء الله بكرة هيكون أحسن من النهارده"ِهل تصدق هذه المقولة ؟؟ ولماذا ؟؟
والله لو بالنسبة للبلد كلها فدا أكيد إن الجاي أحسن من اللي راح أو لسه فيه شوية بؤس بعدها خير إن شاء الله ..بالنسبالي فأنا عمليا تأكدت إن ربنا بيختارلي اللي فيه الخير حتى لو الظاهر غير كدا فميفرقش الظروف كله خير إن شاء الله.

أجمل مقولة سمعتها فى حياتك ؟؟
مش مقولة هو حديث قدسي حديث الظلم " يا عبادي إني حرمت الظلم على نفسي وجعلته بينكم محرما.."الى آخر الحديث بحب اقراه ولولا إني مش عايز أزهق الناس كنت سمعتهلهم كل يوم
من المغنى اللى بتحبه أوى و إيه أحلى أغنية ليه بتحبها ؟؟
السؤال دا ينفض لنفسه بقى :)

"غزة" تمثل لك إيه فى حياتك ؟؟
حاجة واقفة في زوري لا آقدر أنساها ولا حاسس بيها قوي..مش مديها حقها بس مش متجاهلها..
أعطى لإنتمائك لوطنك درجة من مائة ؟؟
أنا انتمائي للإسلام في الأول والآخر
أما بالنسبة للجنسية متهمنيش في حاجة ومتفرقش معايا أي جنسية بس لو هختار يبقى يا ألماني يا نمساوي.
لو تزوجت و أنجبت بنتين و ولدين أى الأسماء تختار لهم ؟؟.
نخليهم 4 ولاد وبنت :)
(يكن ومازن ونوح وآدم والبنت نور) .. اللي هتجوزها إن شاء الله هيا اللي هتختار البنات بس ياريت نور :)
غشيت فى أمتحان و انت صغير ؟؟
وأنا صغير كنت غشاش كبير..كنت فنان في الغش :( .. :)
لو أتعرض عليك رشوة كبيرة و انت فى زنقة ماليه هتعمل إيه ؟؟
أكيد محدش هيجاوب على السؤال ويقول هاخد الرشوة .طبعا هقول أعوذ بالله والكاميرا تيجبني وأنا ماسك السبحة وعيني نص مغمضة..وأقول "يعني أبيع ضميري يا آمال ؟؟" :)
قول 3 صفات ب 3 كلمات بس توصف بيهم شخصيتك ؟
بلاش فضايح :)


اول مرتب ليك وكان كبير يكفي تجيب اغلى هدايا هاتجيب لكل فرد في عيلتك ايه؟
هو أكيد مش هيكفي.. لكن
ماما : ساعة ألماظ لأنها بتحب الساعات..
بابا : بدلة جورج أرماني لأنه بيحب البدل..
أدهم : لاب توب "VAIO" دا لو مكنش بقى قديم..
إبراهيم : تذاكر رحلة يورو تريب..
ايه المجال اللى غير دراستك وشايف نفسك فيه قوي؟

Assassin :)

بتحب السفر؟
:) أكيد
طب دلوقتى حالا ايه المكان اللى نفسك تكون فيه ؟
Dachstein ..Austria
و كان فيه رحلة براغ معرفتش أروحها وشوفت صورها ونفسي أكون هناك بس مش لوحدي
لازم هي تبقى معايا ..هيا مين ؟؟ معرفش

أخيرا أمرر التاج لـ عزيزي أحمد هشام "بلدك يا رأفت"
سنووايت
غادة ورفيدة
شمو نشادر
دكتور بهدوء..