تاج 4 & 5 :)

أشكر صديقي العزيز "عبد الرحمن الديب " صاحب مدونة " حسبي ربي" على التاجين دول..
بمناسبة التاجات.. مش هاقعد أقول بقى مضطر أجاوب وأمري لله ومنك لله يا عبده ع الورطة والكلام دا.. :)

1

اول سؤال:من انت؟
مسلم.. مراد .. والبقية تأتي تبعا

تانى سؤال:بطاقتى الشخصية
الاسم : مراد مصطفى الشهابي

المهنة: طالب بطب الزقازيق..
تاريخ الميلاد : 19-09-1986 يعني متأخر عن دفعتي بسنة.. ودي مشكلة حقيقية :)
محل الاقامة: 100غمر ..دقهلية..
الديانة : مسلم والحمد لله
الحالة الاجتماعية : أعزب بكل تأكيد..وربنا يجيب مطر.. :)

ماهي أحلامك ؟؟
كنت دايما بحلم ان ست عجوزه بترميني من بير السلم من الدور السادس .. هههههههه
لا لا لا لا لا
أنا هقول الأحلام مع الأهداف لأني معنديش أحلام كتير..مش حالم..
نفسي أبقى دكتور شرعي شاطر بجد في المكان اللي انا عايزة لفترة معينة وبعدين أسافر بره ..ممكن أتخلى عن فكرة السفر..أهم حاجة أوصل لهدفي المهني بإذن الله..وإن كان امتحان الشرعي منه لله دمر الدنيا .. :)
بحلم أشتري أستون مارتن برضه ..قديمة دي :)
نفسي أعمل فيلم عن الإسلام والمسلمين يكون دعوة صالحة وقدوة للنشأ.. برضه قديمة :)
بحلم شوارعنا تبقى نظيفة..تعاملنا مع بعض يبقى راقي..نعلى بعقلياتنا شوية كمان..ونوسع مداركنا
أتجوز واحدة بنت حلال وحلوة اوي أحبها بالقدر اللي يخليني أعيش لها وأشيلها في عيني.. لو مش هاعرف يبقى بلاش منه..
نفسي تختفي العصبية والزعيق والنرفزة والاندفاع والتهويل من العالم لأن دول أكتر حاجة بتكرهني في الشخصيات..



رابع سؤال:من اقرب شخص ليك؟
سؤال مش واضح شوية..
أقرب حد لقلبي يعني وبحبه ؟؟ والدتي طبعا..وقطعا..ومنفردة
حد قريب مني ويعرفني كويس ؟؟ الوحيد اللي قريب مني..واخترق الدائرة الخاصة أخويا أدهم ربنا يخلهولي ..شقيقي وأعز أصدقائي.. من الشخصيات اللي تقابلها ومتقابلش زيها تاني..ربنا يحفظه..

2
اول سؤال:اية معنى السعادة من وجهة نظرك؟ حاسس انك سعيد ؟
أنا رأي في السعادة طويل وهتحس إني بتفلسف فبلاش أحسن..حاسس إني سعيد ؟؟ أنا أمارس حياتي ومهامي بلا مشاكل نفسية والحمد لله .. ومن غير هموم حقيقية .. لو تقصد البهجة الزايدة والفرحة المستمرة..لأ..لكني أستمتع بأفعالي جيدا..

تانى سؤال:امتى حسيت انك ظلمت انسان ولية ؟ محتاج للحظة غفران منة ؟
مش لدرجة الظلم .. ممكن نقول قسوة زايدة شويتين.. غفران ؟؟ لأ ..لأن القسوة دي بتبقى للمصلحة وعملية فمش ندمان عليها عشان أغيرها أو أطلب الغفران.. غفران ايه بس يا عبده ؟؟

رابع سؤال:امتى حسيت انك اتظلمت ؟ولية ؟
اتظلمت!!؟؟ الحمد لله انا متظلمتش ظلم مهم يعني وله قيمة..مفيش مواقف استاهلت تتسمى ظلم.. وع العموم اطمنك أنا مش من المخلوقات المظلومة هههههههه..متخليش صحابي يسمعوك بس..

خامس سؤال:اية اكتر احساس بيراودك هذة الايام تجاة نفسك والاخرين ؟

"?? Am I, or the others crazy"
كتييييييييييييير..لا نتفق غالبا..
الحل الوسط.. صحابي قالولي إنت مش مصري ..بس كدا..وبالتالي فلا أنا أقبل شخصية المجتمع ولا المجتمع يقبل شخصيتي..
لكننا نحاول التعايش..يمكن مجموعة أصدقائي لهم عقليات قريبة فمبنحسش بالغربة واحنا مع بعض..خاصة برضه أدهم أخويا :)
مبقولش اننا أحسن .. بقول إننا بس مختلفين شوية

سادس سؤال:امتى ممكن تتنازل عن حق من حقوقك ؟ والسبب ؟
للأمانة برضه .. قليل اوي.. لكن ساعات بضطر لصالح الجماعة اللي انا فيها.. عشان متحصلش مشاكل او لحل المشاكل لو حصلت..لكن واحد لواحد كدا لأ مبتنازلش نهائيا لو حصل خلاف..

أمرر التاجين دول لمين ؟؟
الأول كل صحابي اللي لينكاتهم ع الشمال واللي مش هيحل يا ويله.. سامع يا أدهم ؟؟ :)
سنووايت..غادة ورفيدة..نعكشة..انجي "المهم هات م الآخر"..مواجهات..برينسيس بيري
* باقي التاجات انا بعتذر للي اهدوني تاجات مجاوبتهاش لكن ان شاء الله قريبا والزوار يستحملوا لأني ناوي أنزل الباقي قريب ..
دمتم في حفظ الله

تحديث :تدوينة رائعة في مدونة "بهدوء"......"حالة"
تحديث 2 : جديد جروب لسه بخير.. هتوصلك رسالة ان شاء الله على الاكونت بتاع الفيس بوك لو مشترك.. لو مشترك ..ياريت تشترك :)..لو أول مرة تسمع عنه.. في بوست "لسه بخير"..